قصة سيدنا محمد للاطفال الحلقة 14


كان يا ما كان و ما يحلي الكلام إلا بذكر النبي عليه الصلاة والسلام
ولادي حبايبي دايما لما بيسمعوا اسم سيدنا محمد يردوا علطووووووول.....عليه الصلاة و السلااااااااااام

ممتازييييييييييييين ابتسامة

11 سنة
.... 11 سنة و الكفار بيؤذوا سيدنا محمد ....عليه الصلاة والسلام .....
و بيعملوا كل الأفكار الشريرة عشان يضايقوا المسلمين



لكن المسلمين ثابتين و اقويا .... و صابرين و مستحملين كل الأذي
....عارفين ليه؟
عشان المسلمين عارفين و متأكدين إنهم الصح ...
فمهما الكفار عملوا مش هيسمعوا كلامهم
و هيفضلوا يسمعوا كلام سيدنا محمد .... و يحبوه
عليه الصلاة و السلام

و كان فيه بلد بعييييد بعيييييييد عن مكة ...... بلد جميلة و فيه نخل كتييييير .....
اسمها إيه البلد دي ؟!!!!
البلد دي إسمها ( المدينة )



فاكرينها ؟!!!!!
اللي سيدنا محمد عليه الصلاة و السلام راحها زمااان و صغير مع مامته ....و هناك شاف أخوات مامته .....



البلد دي كان فيها ناس اسمهم الأوس و الخزرج ..... و عايش معاهم اليهود ...

أيام كتير كان اليهود يتخانقوا مع الأوس و الخزرج .... و يضايقوهم ....
وكل مرة يتخانقوا سوا .....يفضل اليهود يغيظوا الأوس و الخزرج ... و يقولولهم :

“احنا اليهووود مستنيين إن ربنا يختار النبي اللي ربنا قالنا عليه في كتبنا عشان يعلم الناس ....
و اول لما يختاره ... إحنا اليهود هنؤمن بيه و نسمع كلامه علطول و قبل كل الناس ....
و هنحاربكم و هنقتلكم مع النبي بتاعنا ......”

و كل شوية اليهود يغيظوا الأوس و الخزرج ......
لغاية لما في يوم من الأيام .....شوية ناس من الأوس و الخزرج قالوا إنهم هيسافروا من بلدهم “ المدينة “ و هيروحوا مكة عشان يحجوا .....
سيدنا إيراهيم من زمااااان هو اللي علم الناس تحج كل سنة ....

عارفييين كانوا كام راجل من الأوس و الخزرج هيروحو يحجوا .....
كانوا 6 رجااااالة .....
6 رجالة سافروا مكة .....



و راحوا عند الكعبة ....




... و شافهم سيدنا محمد .... فسألهم : أنتم مين ؟
ردوا و قالوا :احنا ناس من المدينة اسمنا الأوس والخزرج
سيدنا محمد سألهم :أنتم عايش جنبكم اليهود ؟
ردوا و قالوا : أيوة
فقالهم :طب ممكن تقعدوا أكلمكم ؟؟
فوافقوا وقعدوا ...
سيدنا محمد عرفهم إنه النبي اللي ربنا اختاره عشان يعلم كل الناس إزاي يعبدوا ربنا ...و كمان قرأ لهم القرآن كلام ربنا


الرجالة بصوا لبعض و قالوا :أيوة فعلا ! ....احنا عارفين إن ربنا هيختار نبي ... احنا عرفنا من اليهود اللي عايشين معانا في المدينة ...
و كل لما تحصل خناقة بينا و بين اليهود ..نلاقي اليهود يغيظونا ...و يقولوا إن ربنا هيختار نبي و إحنا اليهود هنسمع كلامه قبل كل الناس و هنحاربكوا و هنقتلكوا يا خزرج !!!
بس دلوقتي احنا عرفنا خلاص إن انت النبي اللي اليهود قالتلنا عليه و كانوا بغيظونا بيك و احنا هنسمع كلامك
و كمان لما نرجع المدينة هنقول لكل أهلنا إن خلاص ربنا اختار نبي .... و هنعلمهم كل الحاجات اللي قولتهلنا ..
خلاص احنا عرفنا إن انت النبي و أنت أعز حد ندافع عنه

و اتفقوا مع سيدنا محمد صلي الله عليه و سلم إنهم هيتقابلوا تاني ... إمتي ؟؟ بعد سنة ...ياااااه كتير أوي ...
هيتقابلوا برضه وقت الحج ....
رجع الخزرج للمدينة ...و عرفوا أهلهم إن ربنا إختار النبي اللي يهود عرفوهم بيه و علموا أهلهم الإسلام ....فبقوا كام مسلم؟؟ ........ 12 ........مسلم...... ابتسامة

.................................................. ...............................................

و بعد سنة كاملة اتقابلوا تاني في الحج
12 راجل من المدينة قابلوا سيدنا محمد ... قابلوه فين ؟
...في مكان اسمه العقبة ! ابتسامة


سيدنا محمد اتفق معاهم علي اتفاق ....اتفق معاهم علي إيييييه؟؟؟
سيدنا محمد قالهم أوعدوني انكم
تعبدوا ربنا و بس ....
ما تسرقوش ....
و ما تقتلوش ....
ولا تعملوا حاجة وحشة و لا تقولوا كذب أو شر
وأوعوا ما تسمعوش كلام سيدنا محمد لو أمركم بخير

و اللي هيعمل الاتفاق ده ربنا هيكتبله حسنات تدخله الجنة
الاتفاق ده سموه بيعة العقبة الأولي .... و اتفقوا يتقابلوا برضه بعد سنة ابتسامة .... في وقت الحج برضه .... ...

ال12 راجل اللي من المدينة وافقوا طبعا علي الاتفاق...
و كمان سيدنا محمد بعت معاهم ....مصعب ..... مصعب ابن عمير
عشان يعلمهم إزاي يقروا القرآن صح ....و يعلمهم الإسلام ..دين ربنا ...

مصعب ابن عمير سموه بعد كده “مقريء المدينة” عشان هو اللي علم أهل المدينة قراءة القرآن ...
و المسلمين كلهم بيحبوه أوي
..............................................

بعد لما عدت سنة ...
جه وقت الحج ... وكل الناس راحت عشان تحج ....
و كان في وسطهم المسلمين الطيبين من أهل المدينة
عارفين بقوا كام واحد ؟؟
بقوا 73 مسلم ....
جايين عشان يحجوا برضه و يشوفوا سيدنا محمد ...

بس كانوا مقررين قرار ... إيه هو؟

اتفقوا إنهم مش هيسيبوا سيدنا محمد في مكة وسط الكفار اللي بيؤذوه و يضايقوه
فاتفقوا إنهم هايقابلوا سيدنا محمد في السر في نفس المكان اللي اسمه العقبة ....


كل الحجاج كانوا نايمين في الخيمة ..... و قام المسلمين بشويش و راحوا عند العقبة عشان يقابلوا سيدنا محمد ...

قابلهم سيدنا محمد و كان معاه عمه العباس ....
عمه العباس مكنش لسه مؤمن ...
بس كان بيحب سيدنا محمد و بيدافع عنه ضد الأشرار الكفار ...
بس سيدنا العباس هيسمع كلام سيدنا محمد في الآخر ويبقي مسلم طيب ابتسامة

المسلمين راحوا عند العقبة .... و قابلوا سيدنا محمد و عمه العباس ...


عم سيدنا محمد .... العباس اول واحد اتكلم و قالهم :
أنا عارف إنكم بتحبوا سيدنا محمد ... و عايزينه يروحو معاكم المدينة ..
بس أنا عاوزكوا تعرفوا إن أنا كنت بحميه من الكفار الأشرار ... و لو مش هتقدروا تدافعوا عنه زي أقرب الناس ليكوا ...
يبقي خلاص خليه في مكة و بلاش يروح معاكم

وقف واحد من المسلمين و قال :
هندافع عنه بأرواحنا .... و بكل قوتنا ..

سيدنا محمد .... قام .... و بدأ يكلم الناس .... عن الإسلام .... دين ربنا ... اللي فيه كل الخير لكل الدنيا ...
و اتفق معاهم علي اتفاق تاني :

1- إنهم يعبدوا ربنا ..... ربنا بس ...

2- إنهم يعملوا أوامر ربنا و يطيعوه

3- يدفعوا فلوس للمساكين و الغلابة و يهتموا بيهم

4- إنهم يعرفوا الناس إيه و الخير و الصح ... عشان الناس تعمله ...
و يفهموا الناي إيه الحاجات الوحشة عشان يبعدوا عنها

5- إنهم يتحركوا بسرعه لأي عمل أو طلب يرضي ربنا من غير ما يخافوا من أي حد

6- إنهم يدافعوا عن دين ربنا ....الإسلام .... و يدافعوا عن النبي اللي ربنا أختاره


فوقف واحد من المسلمين و قال :
و الله .... هندافع عنك بكل قوتنا ! ... و هنفذ إتفاقنا

بس فيه واحد من المسلمين ...وقف و قال :

يا مسلمين المدينة ...أعرفوا إن لو انتم عملتم التفاق ده ... و أخدتم سيدنا محمد معاكم للمدينة ...ودافعتم عنه ...
ساعتها كل أشرار الأرض هتحاربكم .... فلو مش هتستحملوا ... و هتخافوا...يبقي بلاش ...
لكن لو هتكونوا شجعان ...و عندكم قوة و صبر و استحمال خلاص يبقي خدوه معاكم .... و بكده هتبقي كسبتم في الدنيا و الآخرة كمان .

فرد المسلمين :

كلنا هندافع عن سيدنا محمد بكل قوتنا ...ومش هيهمنا أي حد ...ولا هنخاف من أي حاجة ....

و بعدين بصوا لسيدنا محمد و سيألوه :إحنا كده هيكون جزاءنا إيه ؟

رد عليهم : ....................... الجنة ابتسامة

فقالوا :مد إيدك ...

و قاموا كلهم يسلموا علي سيدنا محمد ...
و و هما بيقولوا إنهم هيعملوا كل كلمة حصلت في الاتفاق ده ...
و الاتفاق ده كان اسمه بيعة العقبة التانية ابتسامة

يا تري بقه سيدنا محمد هيسيب مكة و يروح المدينة إزاي ؟ و الكفار هيسيبوه ؟
هنعرف بقه الحلقة الجاية إن شاء الله.
اللهم صل علي سيدنا محمد

موقع مصري

صور حزينه

صور اطفال

صور

صورة

الصور

صور حب

صور بنات

نكت مضحكة

نكت

رسائل حب

كلام حب

قصص

قصص اطفال

صور رومانسية

صور رومانسيه