قصة سيدنا محمد للاطفال الحلقة 25 .. فتح مكة



كان ياما كان ...و ما يحلي الكلام إلا بذكر النبي .....
عليه الصلاة و السلام .....
أحسنتم يا أولادي ... ممتازين ....
عشان دايما عارفين إن كل لما تسمعوا اسم النبي
تقولوا عليه الصلاة والسلام

أنتم عارفين إن ربنا اختار سيدنا محمد عليه الصلاة والسلام عشان يعلم الدنيا الإسلام ...
يعلمهم دين ربنا و إزاي يعبدوا ربنا ...
ويعلمهم أحسن الأخلاق و أطيب الأعمال ..
اللي تملي الدنيا خير و صلاح ..

طب إزاي سيدنا محمد يخلي الدنيا والبلاد البعيدة كلها تعرف عن الإسلام ؟؟؟

سيدنا محمد بعت مسلمين شجعان...
يسافروا للبلاد البعيدة و معاهم رسايل .....

عشان يوصلوها لملوك البلاد .... و يعرفوهم يعني إيه إسلام ...
و يعرفوهم إن كل الناس لازم تعبد ربنا بس و يدعوا ربنا بس ...
و ربنا هو بس اللي يقدر يعمل لنا كل حاجة حلوة عاوزنها ...
وربنا بس هو اللي يقدر يمنع عنا أي شر ....

سيدنا محمد بعت رسايل للملوك... ملوك الأرض ...
بعت رسايل لملك الحبشة ... و ملك فارس ...و ملك مصر ... و ملك الروم
كل ملك يفضل يسأل عن سيدنا محمد ...
و يسأل عن صفاته وأخلاقه ...
و يسأل عن الإسلام دين ربنا ..
لغاية لما كل ملك عرف إن سيدنا محمد عليه الصلاة والسلام هو فعلا النبي اللي ربنا أختاره ...

فيه ملوك أول لما عرفوا كل حاجة عن سيدنا محمد بقوا ملوك مؤمنين طيبين
... و بقوا مسلمين ... دول بإذن الله في الجنة
و فيه ملوك تانية قالت لأ إحنا ملوك و حتي لو هو النبي إحنا مش هنسمع كلامه عشان إحنا ملوك !
طبعا المغرور بمملكته و قوته و متكبر إنه يسمع كلام النبي مكانه بإذن الله في النار
...عشان مفيش متكبر هيدخل جنة ربنا .

و زي مانتم عارفين يا أولاد ... سيدنا محمد عمل إيه مع الكفار في مكة ؟
عمل معاهم اتفاق صلح ... صلح الحديبية ...
يعني مفيش حد يحارب التاني و لا يؤذيه ...
بس كفار مكة بقه عملوا إيه ؟؟.. ما نفذوش الاتفاق ... حزينة
عارفين الكفار عملوا ايه؟

الكفار بقوا في السر يبعتوا أسلحة و رجالة أقويا لأي حد عايز يحارب المسلمين
الكفار ساعدوا الأشرار ... و قتلوا 20 واحد من غير ذنب ... حزينة

الكفار خانوا العهد و مانفذوش الاتفاق و بيساعدوا أي حد بيكره المسلمين ...
مفيش فايدة في قلوبهم اللي مليانة شر للمسلمين ...

أهل الناس اللي اتقتلوا ... راحوا استنجدوا بسيدنا محمد
وقالوله انقذنا من شر الكفار .. دول قتلوا ولادنا و بيساعدوا الأشرار
سيدنا محمد عرف إن الكفار خانوا الاتفاق ....
سيدنا محمد أخد قرار ... قرار بتجهيز جيش يدخل مكة عند الكفار ...

الكفار في مكة عرفوا إنهم عملوا غلط و أنهم عملوا عمل سيء جدا
الكفار في مكة خافوا ...خافوا إن المسلمين يلغوا اتفاق الصلح ...
و بسرعة الكفار قعدوا يفكروا في حل ...
فقالوا أحسن حل نبعت واحد من الكفار عندنا...
بس مش أي واحد ... دول اختاروا يبعتوا رئيسهم ..
رئيسهم “أبو سفيان “ .... رئيس الكفار
عشان يطلب من سيدنا محمد إن اتفاق الصلح يفضل موجود

سافر أبو سفيان من مكة للمدينة ...
و راح لسيدنا محمد ....
بس سيدنا محمد ما رضيش يكلمه ...ولا يرد عليه ....

فراح أبوسفيان لسيدنا “أبوبكر “ صاحب سيدنا محمد ...
و قاله : أطلب من سيدنا محمد إن الاتفاق يفضل وقت زيادة كمان
بس سيدنا أبو بكر قاله :لا مش هعمل كده ...

فراح “أبو سفيان “ لسيدنا “عمر بن الخطاب” صاحب سيدنا محمد ...
و قاله كلملي سيدنا محمد عشان يفضل الاتفاق وقت زيادة كمان
سيدنا “عمر بن الخطاب “ برضه ما رضيش
و قال لأبو سفيان : أنا مش هقول الكلام ده لسيدنا محمد .. انا أصلا عاوز أحارب الكفار .

فراح أبو سفيان لسيدنا “علي” صاحب سيدنا محمد .. و قاله كلملي سيدنا محمد ..
سيدنا “علي” قاله :ماحدش هيقدر يكلم سيدنا محمد في الموضوع ده ..
أبوسفيان رجع مكة ...و هو عارف إنهم خانوا الاتفاق .. و المسلمين مش هيسامحوهم ..


سيدنا محمد و المسلمين بدؤوا يجهزوا جيش ...جيش من أضخم الجيوش
عشان دي أهم معركة .... ده الجيش ده هيروح للكفار جوة مكة ...
بس لازم كل التجهيزات تبقي في السر ...
عشان مش عايزين حد من كفار مكة يعرفوا إن المسلمين جايين عشان ما يجمعوش الأشرار..
سيدنا محمد دعا ربنا إن الكفار ما يعرفوش أبدا

سيدنا محمد قال لكل المسلمين إنهم هيروحوا بالجيش علي مكة
بس لازم يبقي في السر و ماحدش يعرف الكفار في مكة ...

بس فيه واحد من المسلمين اسمه “حاطب” عمل غلطة ...غلطة كبيرة
“حاطب” كتب رسالة ...
قال فيها إن المسلمين مجهزين جيش و رايحين علي مكة ...
و إدي الرسالة لواحدة ست وقالها وصليها للكفار في مكة !

بس طبعا سيدنا محمد عرف ... سيدنا جبريل عليه السلام قاله عشان ينتبه...
بسرعة سيدنا محمد بعت إتنين مسلمين ...”علي” و “الزبير “ ...
وقالهم امنعوا الست اللي معاها الرسالة ...
و هاتوا منها الرسالة ...

راحوا بسرعة الاتنين ..”علي “ و “الزبير “ .. وراها و هي لسة في الطريق ..
و قالولها هاتي الرسالة اللي معاكي ...
الست قالت أنا مش معايا اي رسالة ..
فالاتنين المسلمين “علي “و “الزبير “ قالولها ...
إحنا سيدنا محمد قالنا إنك معاكي رسالة ....و إحنا متأكدين من كلام سيدنا محمد لأنه نبي ...
و لومش هطلعيها هنقتلك بسيوفنا ...
فالست طبعا خافت ... و طلعت الرسالة ... وكانت مخبياها جوة شعرها ....


فالاتنين المسلمين أخدوا الرسالة بسرعة ورجعوها لسيدنا محمد
سيدنا محمد نده “حاطب “ ...و ساله : ليه عملت كده ؟
ليه تعرف الكفار في مكة إننا رايحين مكة ؟؟

رد حاطب و قال :يا رسول الله ..أنا مؤمن طيب.. ومش كافر ...بس أنا عملت كده ..
عشان أنا سايب أهلي وولادي في مكة ...
و خفت لحسن الكفار يؤذوا أهلي لو هجمنا علي مكة ..
ففكرت إني أعمل كده عشان الكفار ما يؤذوش أهلي ...
سيدنا محمد عليه الصلاة و السلام سامح حاطب و عفا عنه ....
وبكدة ما حدش من الكفار في مكة بقي عارف إن جيش المسلمين رايحلهم .

جيش المسلمين كان ضخم جدا ... ...
جيش المسلمين كانوا 10 آلاف واحد ...
عشان ناس كتير دخلوا في الإسلام و بقوا مسلمين طيبين

جيش المسلمين وصل قرب مكة بليل ... و الجيش وقف ...ليه ؟
عشان يدخلوها الصبح و الناس صاحيين ...و ما يفزعوش الناس بليل

أبو سفيان زعيم الكفار ... شاف جيش المسلمين بليل ... و الجيش مستني بره مكة .

إيه جيش المسلمين ده ....ده ضخم جدا و قوي جدا ...
أبو سفيان بقي خايف من قوة المسلمين ...
مين هيشوفه ؟ ... “العباس” ... “العباس” عم سيدنا محمد ...
“العباس “ قال ل”أبو سفيان” تعالي ... تعالي أنا هخدك عند سيدنا محمد عشان تكلمه و يسامحك ..
“ابو سفيان “ راح مع “العباس “ لسيدنا محمد ....
“أبو سفيان “ اتكلم مع سيدنا محمد و لقي سيدنا محمد بيكلمه كلام جميل وطيب
و قاله ليه يا أبو سفيان “ ما تبقاش مسلم ...و تعبد ربنا بس و تسيب الأصنام اللي مش هتنفعك ولا تضرك ولا ليها أي لازمة
أبو سفيان لقي سيدنا محمد قلبه مليان رحمة و طيبة و عايز يعلمه الإسلام اللي فيه كل الخير ...
أبو سفيان زعيم الكفار قال “ أشهد أن لا إله إلا الله و أشهد أن محمدا رسول الله “ و بقي مسلم كده خلاص ابتسامة

أول لما الصبح جه ... أبو سفيان اللي بقه مسلم خلاص وقف عند مدخل مكة فوق مكان عالي ...
يتفرج علي جيش المسلمين .... وهما داخلين مكة

جنووووود كتييييييييييير ... و كل مجموعة شايلة أعلامها ... و أحصنة كتيرة ...
كلهم داخلين مكة ...و هما في منتهي القوة و الشجاعة ... طابور طوييييييل ....مش بيخلص ...

و أبو سفيان متعجب و يسأل : كل دول جيش المسلمين؟ كل دووول جنود مسلمين أقويا و شجعان ؟
لغاية لما دخل مكة آخر مجموعة من الجنود راكبين أحصنتهم و شايلين أعلام خضرة جميلة ...
أبو سفيان سأل مين دول؟؟
قالوله ... دول المجموعة اللي معاهم سيدنا محمد عليه الصلاة و السلام .. ابتسامة
أبو سفيان فضل واقف يتفرج و هو مبهور من ترتيب الجيش و نظامه و قوته و عدده الكبير
أبو سفيان راح للكفار في مكة ...
و جمعهم وقالهم ما حدش يحارب المسلمين ....
دول أقويا جدا وما حدش هيقدر منكم يكسبهم

سيدنا محمد أخييييييرا دخل بلده ....مكة .... البلد اللي بيحبها أكتر مكان علي الأرض
مكة اللي فيها كعبة ربنا ... مكة اللي طرده منها الكفار ...و مشي منها رغم إنه بيحبها جدا

طب يا تري سيدنا محمد هيعمل إيه مع الكفار ؟؟
الكفار اللي عذبوا المسلمين كل أنواع العذاب و حاربوهم بكل الطرق .. ؟
يا تري المسلمين لما يدخلوا مكة بجيشهم القوي ده هيعملوا إيه في الكفار ؟؟؟

سيدنا محمد وقف جوة مكة .... و اتجمع حوليه الكفار ....
سيدنا محمد وقف يكلمهم .... و سألهم : تتوقعوا إني أعمل معاكم ايه جزاء ليكم ؟
رد عليه أهل مكة الكفار : والله إحنا ما نعرفش عنك إلا إنك كريم و أخلاقك كريمة ابتسامة
سيدنا محمد قالهم : أنا عفيت عنكم و سامحتكم ...
قالهم كل واحد هيدخل بيته هيبقي في أمان ...و كل واحد هيروح عند الكعبة هيبقي في أمان
و كل واحد هيدخل بيت أبو سفيان اللي بقه مسلم خلاص هيبقي في أمان ...

سيدنا محمد سمي اليوم ده يوم المرحمة ...لأنه كان يوم كله رحمة رغم قوة المسلمين .


ياااااااه رغم قوتك و قوة جيشك و قوة جنودك يا رسول الله ؟
رغم إنك تقدر تنتقم من الكفار دلوقتي بكل سهولة ؟
لكن اخترت العفو و الرحمة ...
كل أخلاق سيدنا محمد تعلمنا نبقي أحسن و نبقي ازاي أقويا و في نفس الوقت عندنا رحمة تملي قلوبنا

كفار كتير لما شافوا أخلاق سيدنا محمد و معاملته الطيبة ليهم رغم شرهم ...
بقوا عايزين يبقوا مسلمين ... ويبقوا مؤمنين طيبين ...و يتعلموا الإسلام والأخلاق الطيبة

أخيرا رجع سيدنا محمد مكة . ...
و رغم قوته و انتصاره علي كفار مكة ...
ألا إنه دخلها و هو موطي راسه و متواضع لنصر ربنا ... و مدخلش قلبه أي غرور ...
سيدنا محمد دخل مكة ... و هو بيقول آيات القرآن :
إذا جاء نصر الله و الفتح ...ورأيت الناس يدخلون في دين الله أفواجا ...فسبح بحمد ربك و استغفره إنه كان توابا ...

و فضل سيدنا محمد يسبح بحمد ربنا ...و يستفغره و يتوب إليه

و حمد المسلمين ربنا علي نصره و فتحه لمكة و رحمته بيهم .

اللهم صل علي سيدنا محمد و علي آله و صحبه

موقع مصري

صور حزينه

صور اطفال

صور

صورة

الصور

صور حب

صور بنات

نكت مضحكة

نكت

رسائل حب

كلام حب

قصص

قصص اطفال

صور رومانسية

صور رومانسيه